Din tute

Rev. Dr. F. Hrangkhuma

Kum 1941 May ni 31-ah Darzo khuaah a lo piang a. Mizoram Baptist Kohhran ordained minister a ni. Zirna avângin Bangalore lamah chhukin, kum 1975 July 27-ah Bangalore Mizo Christian Fellowship hruaitu ni turin ruat a ni a — BMCF Chairman hmasa ber a lo ni ta a ni.

Pathian thu zirna lamah a thlen san theih ber Doctor of Theology niin, lehkhabu ziaktu leh zirtirtu a ni. Bangalore-ah kum 19 zet a awm chhungin BMCF-ah vawi duai lo hruaitu niin, a theih tawp tak meuhin Pathian rawng a bawl ṭhîn. Inpumkhatna a ngai pawimawh êm êm a, kohhrana inthen darhna thleng ṭhîn hian a rilru a ti na êm êm ṭhîn.

“Pathianin a rawng bawl tura min duh chhung chu upa tak thleng pawhin ka pha ngai lo ang; min duh loh hunah chuan min chawlh tir mai ang,” a ti ṭhîn. SAIACS-a a thawh lai kum 2012-ah a pension ta a; March ni 26, 2022 zanah chuan Lalpa hnenah thlamuang takin min chawlhsan ta a ni.

• Past service
• Pro Pastor, Phawngpui Bial (1971)
• Lecturer, UBS, Yavatmal & Pune (1973–1994)
• Professor, Serampore College (1994–1998)
• General Secretary, BCM (1998–2001)
• Professor, SAIACS (2001–2008)
• Principal, SAIACS (2006–2008)
• Furlough, Fuller, Pasadena CA (2008–2009)
• Professor, SAIACS (2009–2010)
• Professor & Director, SIMI SAIACS (2010–2012)

Rev. Dr. Zaihmingthanga

Kum 1944-ah Kawnpui khuaah a lo piang a. Bangalore-a a zirlai, kum 1975 July 27-ah Mizo tlêmte kalkhawm chuan Bangalore Mizo Christian Fellowship dinin, hruaitu ni turin an ruat a — BMCF Secretary hmasa ber a lo ni ta a ni.

Secretary anga a mawhphurhna a hlen ṭha hle a: committee minute reng reng felfai leh chhiar nuam tak, en let leh pawh cho-awm takin a hnuhma a hnutchhiah a ni. Zirna lamah mi thiam thei leh hawizau a nih avângin, Zofate zinga Doctoral Degree hmu hmasa ber niin, kum 1987 khân Serampore College chuan ropui takin Doctor of Theology (NT) a hlan a ni.

Bible Translation lamah pawh a thawhhlawk êm êm a, vawiin thlengin kawng hrang hrangah a la tel ve thei a ni. BMCF-ah hian rawngbâwlna hna vawi duai lo a châng a, Pathian ram zauh nân leh Zofate inlungrualna turin tha leh zung, hun tam tak a lo seng tawh a ni.

• Past service
• Pastor
• Registrar, ATC
• Principal, ATC
• Moderator, Mizoram Synod
• Executive Secretary, Mizoram Synod
• President, NECC
• President, ATTA
• Associate Director & Consultant, BSI
• Adjunct Professor, ATC
• Principal, Kawnpui College

Rev. Raldawna Fanchun

Kum 1945-ah a lo piang a. Kum 1974 September ni 22-ah B.D. zir turin Bangalore-ah a lo chhuk a; kum 1975 July 27-a Bangalore Mizo Christian Fellowship a lo din khân Treasurer hmasa ber ni tura ruat a ni. Kum 1974–1978 chhung khân BMCF-ah Treasurer leh Secretary vawi hnih a ni hman a ni.

Pa inngaitlawm leh Pathian tih mi a ni a, rawngbâwlna ngai pawimawh mi tak a ni. LIKBK kohhranah an puipa ber niin, rawngbâwlna peng tinah mi tangkai tak a ni. BMCF hruaitu a nih lai pawhin theihtawpa Pathian leh a kohhran tana rawngbâwl mi a ni.

• Past service
• Secretary, Sunday School, LIKBK (1978–1983)
• Senior Executive Secretary, LIKBK (1983–1996)
• Executive Secretary in-charge Finance, LIKBK (1996–1999)
• General Secretary, IKK (1999–2001)
• Executive Secretary in-charge, Mission and Christian Education (2001–2007)
• Pastor
• Assembly Chairman (2010–2015)

Pu Rin Sanga

Mission Veng, Aizawl-ah a lo piang a. Lehkha thiam thei tak a nih avângin Cotton College, Guwahati aṭangin BA distinction-ah a pass a; kum 1988–89-ah UK aṭangin Diploma in Development Studies chu Cambridge University aṭangin a zo leh a ni. Kum 1969-ah Indian Administrative Service zawmin, Karnataka state-ah cadre changin hmun hrang hrangah a lo awm kual tawh a ni. Mi lehkhathiam a ni tih a lanna chu, IAS hi first attempt-a a tling thei kha a ni.

BMCF Founding Member niin, hruaituah pawh vawi tam tak a lo ṭang tawh a. BMCF a sulsutu niin, hmasawnna rahbi min kaitîr tute zinga mi pawimawh tak a ni. Bangalore-a Mizo awmte tân a tangkaiin a thlamuanpui awm êm êm a ni.

Kum 1986–1992 chhungin deputation-a chhuakin Mizoramah a awm a; deputation a zawh hnuin Karnataka-ah a lo let leh a. Kum 36 chhung teh meuh rinawm taka sorkâr hna a thawh hnuah, July 2004 khân superannuation-in a pension ta a ni.

• Karnataka leh Mizorama hna a chelh tawhte
• Secretary, City Improvement Trust, Bangalore
• Dy. Commissioner, Bidar District
• Jt. Secretary, Public Works & Power Department
• Divisional Commissioner, Bangalore Division
• Managing Director, KVIB, Mizoram
• Secretary, Social Welfare, Education & Industry, Mizoram
• Secretary to the Chief Minister, Mizoram
• Home Commissioner, Mizoram
• Finance Commissioner, Mizoram
• Development Commissioner, Mizoram

Rev. Dr. Lalsawma

Kum 1930 June ni 28-ah Sailam khuaah a lo piang a. Kum 1974-ah Bangalore-ah a awm a, thla rei lo te a awm chhung khân, Mizo tlêmte pawh ni ila Pathian biakna hun leh hmun neih a pawimawhzia a hria a; chuvângin kha tih laia Mizo awmte zingah khân chanvo te a ruat hlawm a, a kum leh July 27, 1975-ah chuan Bangalore Mizo Christian Fellowship tih din a lo ni ta a ni.

Hruaitu hmasa atana a ruatte chu — Chairman, Rev. F. Hrangkhuma; Secretary, Pro Pastor Zaihmingthanga; Treasurer, Tv. Raldawna Fanchun te an ni. BMCF lo pian chhuahna atana a sulsutu pawimawh tak a ni kan ti lo thei lo a ni: BMCF history-ah hmun pawimawh tak chângin, ama finchhuahna-in BMCF hian bung hmasa ber a lo chuangkai ta a ni.

India ram President Shri Abdul Kalam-a hnen aṭangin kum 2005 khân Padma Shree ropui takin a dawng bawk a ni. Kum 2017 February ni 9 khân ama chenna In, Mission Veng-ah, Lalpa hnenah thlamuang takin min chawlhsan ta a ni.

• Past service
• ECM, Mizoram Synod (1965–1987)
• Secretary, Mizoram Synod (1966–1967)
• Moderator, Mizoram Synod (1968; 1987)
• Secretary, APCNEI (1965–1968)
• Moderator, APCNEI (1972–1974)
• ECM, APCNEI (1965–1978)

Rev. F. Rammawia

Kum 1941-ah Serkawnah a lo piang a; a pa chu Rev. Aihranga a ni. South Vanlaiphai kohhran phuntu-ah Pathianin a hmang a, kum 1956 khân Darzo khuaah a pa kutah Baptisma a châng a ni.

Zirna kawngah a tluang hle a. Kum 1962–1964 chhungin South Vanlaiphai Private High School-ah zirtirtu hna a thawk a, kum 1962 tâwp lamah piantharna a châng ta a ni. Kum 1964–1967 chhungin Cherrapunjee-ah L.Th a zir a. Kum 1973–1977 chhungin UTC, Bangalore-ah B.D. a zir a — Bangalore-a Mizo tlêmte awm hmasate zingah a tel ve a, kum 1975-a BMCF din a nih lai khân member tangkai leh pawimawh tak zinga mi a ni.

Kum 1993 August ni 5-ah duh tak leh lâwm taka rawng a lo bâwl ṭhîn Lalpa hnenah min chawlhsan ta a ni.

• Past service
• Pro Pastor, Hnahthial Grouping Centre (1967–1970)
• Teacher, Jubilee Bible School, Serkawn (1970–1971)
• Pastor, Vaseitlang Bial (1971–1973)
• Pastor, Tlabung leh Chawngte Bial (1977–1978)
• Field Director, Kurku, MP & MS (1978–1989)
• M.Th, UTC, Bangalore (1989–1991)
• Teacher, MTI, Serkawn (1991–1993)