Chaplain

Rev. Khiangnunfima

Kum 1987-ah Hmawngchuan, Jampui, North Tripura-ah a lo piang a. A lawina tualchhung kohhran chu Hmawngchuan Baptist Church, Jampui Sakhan Baptist Association hnuaia mi a ni. Piantharna a chan dân chu ama ṭawngin — “Camping emaw Crusade emaw ah ni lovin, ka nu leh pa ten Lal Isua Chanchin min hrilh aṭanga piangthar pawh ka ni. Krista-ah ka ṭhanlen zelna turin ka nu leh pa te hian min zirtir reng ṭhîn a ni.” Hun puma rawngbâwl hi a naupan lai aṭanga a tum a ni a; kum 2005-ah Pathian hnenah a nun a inhlan a — “I rawng chauh ka bawl ang,” tiin.

Zirna kawngah — Matric chu NIOS aṭangin kum 2006-ah, Class XI–XII Meghalaya Board of School Education (Shillong) aṭangin kum 2008-ah a zo a. Northeastern Hill University hnuaiah Bachelor of Arts kum 2011-ah; Senate of Serampore hnuai Academy of Integrated Christian Studies aṭangin Bachelor of Divinity kum 2016-ah; Senate of Serampore hnuai Union Biblical Seminary, Pune aṭangin Master of Theology (Systematic Theology) kum 2019-ah a zo a ni.

BMCF a rawn thlen hmain kohhran rawngbâwlnaah a inhmang tawh hle: Shillong-ah TKP hnuaiah chanvo hrang hrang, kum 2016–2017-ah JSBA Mission hnuai Tripura Mission field-ah missionary — school-a thawh pahin kohhran a enkawl — leh Mizoram leh Jampui kohhran hrang hrangah camping leh crusade speaker. Pune-a M.Th. a zir laiin Pune Mizo Welfare Association-ah hruaitu dinhmun a chelh a, chutah chuan Zoram pawna Mizo te zinga rawngbâwlna a pawimawh zia a hmu fiah a — chu chu BMCF Chaplain hna a dil chhan a ni.

Leonard Theological College, Jabalpur-ah Assistant Professor atan kum 2020-ah lâk a ni ve hlauh a; Covid-19 hripui avângin appointment chu cancel a ni ta a. Chu hun inher dânglam chuan BMCF-a a rawngbâwlna tur kawngka a rawn herchhuak ta thung a ni. September ni 15, 2020-ah Bangalore a thleng a — Upa Josiah leh Upa Lawmna te’n Airport-ah an lo hmuak a — karkhat inkhung hrang (quarantine) hnuah BMCF Quarters-ah a luh lût a ni.

Inkhâwmna hmun chu harsa takin an zawng a; Upa Josiah rawngbâwlna hmun Shalom YWAM Centre-ah an inkhâwm hmasa a, a tâwpah UTC Ranson Hall a remchang ta. Quarters chu ni li bawr vel hnatlangin an chei ṭhat a. Counselling rawngbâwlna a ṭan a — harsatna nei te tan Chaplain number chu flyer-ah tar chhuah a ni a, zing dar 10 aṭanga chawhnu thlengin harsatna neite a dawngsawng a, chumi hnuah damlo leh mamawhna nei tlawh a chhuak ṭhîn; Bangalore chauh ni lo, India ram hmun ṭhenkhat leh Mizoram lam aṭang thlengin call a dawng. Kamanahali-a Mizo thingpui dâwr pakhat chu “Mission Centre” an vuah a, kohhran leh khawtlang lama rawn lang ngai lo ṭhalai te an be ṭhîn.

Chu hun chhung chuan — Covid Response Team dinin harsatna tawkte medical support pêk a ni; Karnataka hnuaia BMCF Society registration tihnun leh a ni; Dânbu siam ṭhat a kal zêl a; Chawlhkar Inkhâwm chu Chaplain kutah dahin Bangalore North leh South-ah inkhâwmna hmun nghet nei a ni; Praise Team mumal taka din chhoh a ni; Bangalore Baptist Hospital nen inzawmna siamin member te tan Shepherd Card lâk a ni. Kum 2022 December ni 4-ah Upa nemngheh inkhâwmah Presiding Minister a ni — Mizote history-a Non-denominational Church-a Upa nemngheh hmasa ber chu a ni.

“Pâwl thuneihna (institutional authority) aiin thlarau lam thiltihtheihna (spiritual authority) hi engtik lai pawhin a dah pawimawh zâwk a. Chuvângin Chaplain hna pawh hian administrator nih aiin chhiahhlawh rawngbâwltu nihna a keng lian zâwk a,” tiin a ziak a. Kum 2023 April-ah, zirna chhunzawm turin a chhuahsan a; tûnah hian Serampore College, Kolkata-ah a awm.

• Zirna leh rawngbâwlna
• Asst. Secretary, TKP Shillong Unit (2009–2010)
• Vice President, TKP Shillong Unit (2010–2011)
• Executive Committee, BCM Shillong Bial TKP (2008–2011)
• Hostel Secretary, AICS (2014–2016)
• Missionary, JSBA Mission, Tripura Mission Field (2016–2017)
• Hruaitu, Pune Mizo Welfare Association (M.Th. a zir lai)
• BMCF Chaplain (2020–2023)

V. Lalrobuanga

Kum 1990-ah a lo piang a, Mualthuam North khua mi a ni. A lawina tualchhung kohhran chu BCM Mualthuam North, Baptist Church of Mizoram hnuaia mi a ni.

Piantharna chu kum 2011-ah, Pu C. Lalnuntluanga camping aṭangin a chang a. Kohna chu a pa kaltlanga a dawn a ni — ama ṭawngin, “Pathian rawngbâwl turin min ti a, chumi aṭang chuan ka rilruah a thi thei tawh lo a, ka pa thu zawmin ka damchhûng-in Pathian rawngbâwl hna hi ka tum ve ta a ni.”

Zirna kawngah — Matric chu Staines Memorial School aṭangin kum 2007-ah, Class XII chu St. Joseph Higher Secondary School aṭangin kum 2010-ah a zo a. Bachelor of Commerce chu HATIM aṭangin kum 2017-ah; Bachelor of Divinity chu Academy of Integrated Christian Studies aṭangin kum 2023-ah a zo a ni. B.D. a zir chhûng khân a lawina kohhranah thusawi, zaikhâwm kaihhruai leh zîng ṭawngṭai hruai te a chelh ṭhîn a; an khuaa BCM Mualthuam-in school an din ve chu a haw chângin zirtirna hnaah a pui ṭhîn.

“Pastoral interview te la tih ve ka tum a, chumi hma a rawngbâwlna zau zâwk leh ṭha experience neih ka duh vâng a ni,” tiin BMCF Chaplain hna a dil chhan a ziak a. Kum 2023 June ni 10 Executive Committee-in Chaplain atan a ruat a; June ni 28, 2023-ah Bangalore a lo thleng a — Airport-ah Chairman leh BṬP hruaitu ten an lo hmuak. July ni 2, 2023 Pathianni inkhâwmah Rev. Lalrohlua Pachuau-in Induction a nei a, mi 230 chuang an inkhâwm. July ni 1 aṭangin Chaplain Quarters thar (Melody Apartment) luah a ni.

Chaplain Quarterly Report chu a pe ṭhîn a; thlanthut, damlo tlawhna leh chhungkaw tlawhna te a kaihhruai a, M&E ṭawngṭai inkhâwm leh Chawlhkar Inkhâwm te a enkawl bawk. Kum 2025 General Body Meeting-ah Returning Officer a ni.

Contract hun chhûng kum hnih a zawh hnuah, M.Th. zir chhunzawm turin a chhuahsan a; March ni 30, 2025 Biak In inkhâwmah a thlahna hun neih a ni.

• Zirna leh rawngbâwlna
• B.Com, HATIM (2017)
• B.D., Academy of Integrated Christian Studies (2023)
• Thusawi leh zaikhâwm kaihhruaitu, BCM Mualthuam North
• Zirtirtu, BCM Mualthuam School
• BMCF Chaplain (2023–2025)

H. Lalremsanga

Kum 1994-ah a lo piang a. A lawina tualchhung kohhran chu Baptist Church of Mizoram, Bethel, Lawngtlai a ni. Kristian chhûngkuaa seilian a ni a — ama ṭawngin, “Tet te aṭanga Kristian chhûngkua aṭanga seilian ka nia; naupang te ka nih in ka piangthar a, Biak In dâr vâwtu-ah ka ṭan zui.”

Kum 2010 khân BCM Recognised Evangelist Team-ah rawngbâwlin a chhuak a; kum 15 chhûng a kal tawh a, tûnah hian Team Deputy Speaker a ni mek. A tualchhung kohhranah rawngbâwltu niin, TKP, Sunday School, KNP leh Evangelical cell rawngbâwlnaah hruaitu a ni ṭhîn. Evangelist team-a a awm avângin thla hlâwh hna a thawk ngai lo.

Kum 2015-ah JBS Serkawn-ah Pathian thu a zir lai chuan thûk zâwka rawngbâwl turin Lalpa kohna a hria a — mahse class 12 a pass lo avângin a tih ngaihna a hre lo hle. Lalpa kohna-ah a chian êm avângin class 12 chu open-ah a exam tha leh a; a pass thei lawk lo avângin a bei a dâwn hman hle a; mahse vawi ngaa a exam hnuah, kum 2018-ah class 12 chu a pass ta a ni. Chumi hnuah JRTC-ah B.D. a zir a, kum 2024 April-ah a zir zo ta a ni. “Thûk thei ang ber leh zau thei ang bera Lalpa rawngbâwl hi, Lalpa min kohna ka chhân ve na ni in ka ngai,” a ti.

BMCF Chaplain hna a dil chhan chu — he hna hian midangte thlamuan leh tichak lam a kâwk ber avâng; Pastoral Ministry ṭha tak a nih avâng; pâwl bik leh denomination thliar lova, zau taka rawngbâwlna — holistic mission — a nih avâng; thûk zâwka rawng a bâwl theih avâng. A tuina chu counselling, preaching leh evangelism a ni.

Kum 2025 March ni 27-ah Bangalore a lo thleng a — Airport-ah Chairman Upa Josiah L. Ralte, Chaplain V. Lalrobuanga leh BṬP OB ten an lo hmuak a, Quarters-ah BHP ten zanriah an lo buatsaih a, Rev. Samuel Lalduhsaka’n Pathian hnena lawmthu sawina a hmang. March ni 29-ah Chairman te inah Orientation neih a ni a, April ni 6, 2025-ah Induction neih a ni.

Chawlhkar Inkhâwm Convener niin, Worship and Pastoral Committee-ah member a ni bawk; Rawngbâwltu Training-ah hruaitu a ni ṭhîn a. Venpui Zan leh Easter Sunday 2025-ah thuchah a sawi. “BMCF hian tlâng hrang hranga Zohnahthlak awm te nghet taka min phuarkhawmin, zaikhatah min luantîr a, a hlu hlê mai,” tiin Golden Jubilee Souvenir-ah a ziak a ni.

• Zirna leh rawngbâwlna
• Evangelist, BCM Recognised Evangelist Team (2010 aṭangin)
• Team Deputy Speaker, BCM Recognised Evangelist Team
• Rawngbâwltu, BCM Bethel, Lawngtlai
• Hruaitu — TKP, Sunday School, KNP leh Evangelical cell
• Class XII (2018)
• B.D., JRTC (2024)
• BMCF Chaplain (2025 aṭangin)